ÚT FYRIR LANDSTEINANA: Edinborg

ÚT FYRIR LANDSTEINANA: Edinborg

Í byrjun desember skrapp ég með mömmu minni til Edinborgar í Skotlandi.

Ég get ekki annað en mælt með því að þið kynnið ykkur þessa borg því hún er virkilega falleg, með sjarmerandi byggingarstíll og margt að skoða.
Ég ætla að deila með ykkur myndum úr ferðinni og nokkrum stöðum sem mér fannst standa upp úr. Helmingurinn af þeim stöðum eru að sjálfsögðu veitingastaðir, enda sem matgæðingur finnst mér þeir vera stærsti parturinn af ferðaupplifuninni.

John Lewis

Við mamma duttum heldur betur í lukkupottinn þegar við fundum þessa búð. Við byrjuðum ferðina á frekar glötuðum outlet verslunarklasa sem heitir Livingstone (mæli ekki með) en þessi búð kætti okkur við. Þar er allt til alls, en verslunin er á nokkrum hæðum og skiptist í gjafavöru, heimilisvörur og svo fatnaður á konur, börn og menn. Við fórum alls ekki tómhentar þaðan en ég hefði verslað svo mikið meira ef ferðataskan væri botnlaus!

Hversu sætar piparkökur?

Ég heillast mikið af heimilisvörum í kopar, og var þar úr nægu að velja.

 

Edinborgar kastali

Þetta er eflaust einn vinsælasti ferðamannastaður til að skoða í Edinborg og er það engin furða. Ef þið eruð hrifin af sögu og fornminjum, mæli ég með að skoða kastalann. Mér þótti þetta bæði áhugavert og fallegt.

Jólamarkaðurinn

Jólamarkaðurinn hefst yfirleitt í byrjun desember og er út fyrstu vikuna í janúar. Markaðurinn fer ekki fram hjá neinum en hann má finna á móti Princess street, aðal verslunargötu Edinborgar. Ef þú ert að ferðast til Edinborgar á þessum tíma þá er afskaplega notalegt að rölta í gegnum markaðinn með heitt vín og jólalög í bakgrunn.

The Conan Doyle

Þessi veitingastaður er einnig bar, en þeir eru þekktir fyrir frábæra gin seðil sinn. Við mamma erum einkar hrifnar af gin og tónik, og þótti því ekki leiðinlegt að smakka þær ýmsu tegundir sem stóðu til boða. Við enduðum á að fara heil þrjú skipti á staðinn, ekki alltaf í mat, en fyrir notalegu stemninguna og góða drykki.

Æðisleg linsubauna- og sætkartöflubaka.

Treacle

Æðislegur staður en hávær á kvöldin. Flottur drykkjarseðill og gott úrval fyrir grænkera.
Okkur líkaði maturinn svo vel að við fórum eitt skiptið í kvöldmat og svo aftur í hádegismat daginn eftir.

Mangó-, graskers- og avocado risotto og djúpsteiktir bananar með kókosrjóma í eftirrétt. Bilað gott! Myndi klárlega fara aftur á þennan stað, sérstaklega fyrir eftirréttinn.

Sætkartöflu franskar í chilli salsa og ferskt mandarínu-, melónu- og trönuberja salat í hádegismat daginn eftir.

Las Iguanas

Seinast en ekki síst var þessi Suður- Ameríski veitingastaður í miklu uppáhaldi. Hann er mjög vinsæll og þurftum við að bóka borð þar en það var lítið mál og borðapantanir mögulegar á netinu. Það var einnig frekar hávært þar enda fórum við á laugardagskvöldi.
Maturinn var einstaklega góður og góð stemning á staðnum.

Las Iguanas bar fram einn besta karrí rétt sem ég hef smakkað, með pálmahjörtum, graskeri og öðru grænmeti í sætri kókos sósu og kókos búðingur í eftirrétt með berja- og mangó sósu. Mæli virkilega með.

Við gerðum margt fleira skemmtilegt en ég vil ekki hafa bloggið of langt, ég mæli með því að þið kynnið ykkur borgina því ég fer klárlega aftur!

Þar til næst.

Author Profile

Amanda

Amanda er vegan stelpa sem starfar sem lyfjafræðingur og elskar að borða góðan mat. Áhugamál eru eldamennska, hreyfing, heimilið, sanngjörn tíska (fyrir dýr og menn), umhverfisvernd og ýmislegt tengt lífsstíl.


Facebook Comments