Litlu hlutirnir!

Foreldrahlutverkið getur verið mjög krefjandi á köflum ásamt því auðvitað að vera skemmtilegt. Litlir hlutir sem skiptu ekki máli áður eru allt í einu orðnir mjög mikilvægir og spila stóran þátt í daglegu lífi ykkar. Ég ákvað að setja upp smá lista yfir hluti sem geta gjörsamlega umturnað deginum fyrir foreldrum. Hlutir sem þú vissir ekki einu sinni að væru „hlutir“ af því að áður en þú varðst foreldri voru þeir merkingalausir!

Þú ert stödd í lyftu með 3 ára barninu ykkar og einhver óþokki kemur inn og ýtir á takkan á undan barninu ykkar! Dagurinn er ónýtur! Þetta kostar auðvitað aðra lyftuferð niður þar sem þú þarft að verja takkana með kjafti og klóm fyrir óprúttnum aðilum svo að barnið geti stutt á blessaða hnappinn.

Þú ert að drífa þig á fund og ákveður að henda pulsu og svala í aftursætið þar sem krakkinn er ekki búinn að borða síðan Guð má vita hvenær. Þar sem þú ert að drífa þig geriru þau miklu mistök að stinga rörinu ofan í svalafernuna hjá barninu þínu …þarf ég að segja meira?

Plast diskar og glös frá Ikea prýða eflaust mörg barna heimili enda afskaplega hentugt fyrir litla fólkið. En hvernig datt þeim í hug að hafa allt í sitt hvorum litinum í pakkanum!? Til þess að gera barnafljölskyldum lífið leitt! Þess vegna! Þar sem búa tvö eða fleiri börn myndast heimstyrjaldar ástand í hvert skipti sem lagt er á borð þar sem að sjáfsögðu vilja allir sama litinn!

Þá er það síðast en ekki síst, uppáhaldið mitt: Klukkan er að ganga ellefu. Þú ert loksins búin að koma öllum í rúmið og ert að mynda þig við að gera hið sama. Þá heyriru lítið trítl koma eftir ganginum og barnið þitt birtist í dyragættinni og segir „mamma, meðan ég man þá á ég að mæta með 50 muffinskökur í skólann í fyrramálið!“.

Þetta er auðvitað allt skrifað í góðlátlegu gríni en ég er nokkuð viss um að það eru nokkrir sem tengja!

runa

Facebook Comments
Share:

Leave a Reply

Your email address will not be published. Required fields are marked *